महाकवि देवकोटा क्याम्पसमा पुरस्कार वितरण कार्यक्रम सम्पन्न

मितिः२०८०/०२/०४ गतेका दिन महाकवि देवकोटा क्याम्पस अतिरिक्त क्रियाकलाप शाखाको आयोजनामा यसै क्याम्पसको सभाहलमा खेलकूद सप्ताहमा सहभागी भएर विजेता र उप विजेता बन्न सफल खेलाडी विद्यार्थीहरुलाई हौसला प्रदान गर्ने उद्धेश्यले पुरस्कार वितरण कार्यक्रम सम्पन्न भएको छ ।

महाकवि देवकोटा क्याम्पसका क्याम्पस प्रमुख नारायण प्रसाद ढकालको अध्यक्षता, क्याम्पस संचालक समितिका अध्यक्ष कृष्ण प्रसाद लामिछानेको प्रमुख आतिथ्यतामा सम्पन्न भएको सो प्रतियोगितामा सहायक क्याम्पस प्रमुख, BBA/BICTE कार्यक्रमका संयोजक, शिक्षक,कर्मचारी र BBA/BICTE अन्तर्गत विभिन्न सेमेस्टरमा अध्ययनरत विद्यार्थी गरी १०० बढीको सहभागिता रहेको थियो ।

उक्त कार्यक्रममा अतिरिक्त क्रियाकलाप शाखाद्वारा संचालन गरिएका भलिबल, फुटसल, स्लोसाइकल रेस, म्युजिकल चेयर, क्रिकेट,घैँटो फुटाई,रिले रेस,सट पुट जस्ता प्रतियोगितामा प्रथम, द्वितीय र तृतीय स्थान प्राप्त गर्न सफल भएका विद्यार्थीहरुलाई प्रमुख अतिथिद्वारा मेडल र प्रमाणपत्र साथै सभाध्यक्षद्वारा टीका प्रदान गरिएको थियो ।

सो कार्यक्रममा शुभकामना मन्तव्य प्रस्तुत गर्दै प्रमुख अतिथि लामिछानेले विभिन्न प्रतियोगितामा विजेता र उपविजेता बन्न सफल विद्यार्थीहरुलाई शुभकामना दिँदै खेलकूदले विद्यार्थीहरुको शारिरीक र मानसिक विकास गर्ने साथै विद्यार्थीहरुलाई अनुशासित बनाउँदै सबैसंग भाइचाराको सम्बन्ध विस्तार गर्ने विचार व्यक्त गर्नु भयो । समापन मन्तव्यका क्रममा सभाध्यक्ष ढकालले उपस्थित सम्पूर्णलाई धन्यवाद दिँदै विजेत र उप विजेतालाई शुभकामना दिनुभयो साथै उहाँले जित र हार भन्ने कुरा सामान्य कुरा भएको तर्फ सङ्केत गर्दै खेलकूदमा सहभागिता नजनाएका विद्यार्थीहरुलाई सहभागी हुन आग्रह गर्नु भयो । उक्त कार्यक्रममा BICTE Coordinator हरिदत्त शर्माको संचालन र ECA Coordinator सुलोचना अर्यालको स्वागत मन्तव्य रहेको थियो ।